حزيرة!!..

اسمع هالحزيرة، بيجمعنا الحلم وبتفرقنا المجزرة، بنتمنى نخلص.. بس الأمنية عم تنفهم انو نخلص وعم نخلص.. يوم عن يوم عم نخلص بس ما عم نخلص!.

انت أفهم مني.. ما عندي مشكلة بس خلصني، أنا معبى ببنطرون وانت بصدر الصالون، بس خلصني.

عم ينحبسوا بالبيت مشان ما ينشحطوا عالجبهة، الجبهة مو دفاع عن وطن.. دفاع عن آثار ونفط وذهب وغاز.

الوليد بن طلال بعدو أثرى الأثرياء عربياً وعالمياً، ونحنا بعدنا أتعس التعساء، مو حسد ولا غيرة بس شو هالمعادلة الغريبة، مالو عم يكتر ونحنا عم نخلص.

عصابة المجتمع الدولي ومجلس الأمن بعدا عصابة آمنة، وأنا عم اتغير.. مرة ثائر ومرة إرهابي ومرة مواطن.

العيشة مرة.. يا معتقل يا خايف تطلع من بيتك وتصير معتقل، وعم نخلص، لحد هي اللحظة عم نخلص..

لحقونا قبل أن تفقدونا، وبعدك على بالي.