أحلام الشباب

شو بتحلم ؟؟ سؤال جوابه مرتبط بالأمل .. بس يا ترى شو بكون جواب هالسؤال عند شباب فاقدين الأمل إنه تتحقق أحلامهم ببلد تعبت من كل أشكال الحرب.

معقول يتحول جواب شو بتحلم من بدي كفي دراستي أو أعمل ماجستير لجواب حلمي ما تقطع الكهربا، أو اشتري ربطة خبز بدون ما وقف عالطابور وانطر دوري أو استخدم البطاقة الذكية، أو حلمي لاقي شغل.

هيك تحولت أحلام الشباب والصبايا بسوريا من أحلام الطفولة يلي مرتبطة بالنجاح لأحلام مرتبطة بظروف بلد عم يعيشوه فيه ويمكن أكبر أحلامهم اذا ما استقرت أمور البلد يلاقوه حالهم مسافرين لغير بلد ، أو يفيقوا وحدا يقلن صباح الخير لسه الدنيا بخير ويلي عشتوه بسنين الحرب كان هو حلم.

أنوار ورفقاتها تناقشوا عن أحلامهم وأحلام الطفولة إذا بعدا مرافقتهم  وشو بيحتاجوا لتتحقق .. اسمعوهم بهالحلقة من بودكاست "ع طريقتنا"، وخبرونا شو حققتوا من أحلامكم؟ وهل بعدكم بتحلموا ولا بتعيشوا كل يوم بيومه؟