حلقات | 25 05 2020
الحلقة الحادية عشرة
في مقولة شهيرة بتقول : "احذر الحليم اذا غضب" يعني انتبه من الرايق و الصبور الهادي إذا شي مرة فقد أعصابه لأنه غضبه عادة بيكون صعب كتير, ومن كتر مابيتحمل و بيعبي جواته فجأة ممكن يطلع هاد الغضب متل الإعصار يلي مابيشوف حدا قدامه.
كلنا منعرف انه الغضب بشكل عام غير مستحب لأنه بيخلينا نطلع عن شعورنا و نبطل منطقيين و منصير نخلط الحابل بالنابل وشعبان برمضان ببساطه يعني: منصير نخبص وممكن بسبب لحظة غضب نخسر ناس كتير بيحبونا و منحبهن لأنه الكلمة البشعه بس تطلع ونحنا بحالة الغضب بتجرح و بيصير صعب نداوي.
في حلقة اليوم من "لو كنت مكاني" بتحكيلنا يارا صبري عن الشخص الهادي لما يعصب، وكيف بيعبي جواته كتير وفجأة بيعصب، وعن الخسارت يلي ممكن يتعرضلها بسبب عصبيته.
