أسعار الموبايلات مرتفعة بالسويداء وأزمة البنزين مستمرة

حكينا اليوم مع مراسلنا هشام الخطيب من السويداء، وخبرنا إنه الطرق سالكة بالمحافظة والقرى المحيطة فيها، عدا القرى الشمالية يلي عم يتم زرع عبوات ناسفة فيها أحياناً، وخصوصاً عند قريتي البثينة والحقف، أما التدقيق على الحواجز عم يكون ع طريق السفر بين دمشق والسويداء وخاصةً للشباب بسبب الخدمة العسكرية.

وحكالنا هشام أيضاً أن أزمة البنزين بالسويداء لساتها موجودة، خصوصاً إنه قبل كان مخصص 16 صهريج لتغذية السويداء، ونزل العدد إلى عشرة صهاريج، من ثم لـ 6 لذلك خلقت أزمة بنزين وارتفاع بسعره ليصل إلى 250 – 300 للتر الواحد، مع توزيع بطاقات بنزين مخصصة للسيارات وسعر البطاقة منها ألف ليرة لكل 25 لتر بنزين.

أما بالنسبة لأسعار المواد الغذائية، خبرنا مراسلنا هشام عن ارتفاع حصل على أسعار الزيت والسمنة والبيض والفروج، بسبب ارتفاع سعر صرف الدولار يلي عم يتراوح بين 295 – 297، وحكالنا هشام عن ارتفاع اسعار الموبايل وبيوصل الفرق بين دمشق والسويداء بين 2000 – 3000 ليرة عن دمشق، وهالارتفاع شمل أيضاً أسعار معظم الأجهزة الإلكترونية.

 تفاصيل أكتر بتسمعوها بـ"تحويلة" اليوم