سكان شمال غرب سوريا عم يواجهوا مشاكل بيئية كبيرة، وناقشنا هالمشاكل بحلقات سابقة من بودكاست "شو الحل؟"، وركزنا على مبادرات محلية وجهود منظمات المجتمع المدني.
واحدة من أكبر المشاكل هي قطع الأشجار، يلي سبب آثار كارثية على المناخ المحلي وعلى حياة الناس.
المهندس مؤيد الشيخ حسن، الخبير بالمنطقة، بيقول إنو حملات التشجير اللي عم تقوم فيها منظمات المجتمع المدني والفرق التطوعية، رغم أهميتها ما بتكفي، والسبب هو غياب الحوكمة اللازمة، ولازم الدولة تكون شريكة بهالمجال.
وبيشدد على أهمية استشارة الخبراء لتحديد الأنواع النباتية يلي بتتحمل التغيرات المناخية وبتناسب البيئة المحلية.
ومن المبادرات أيضاً، مبادرة لتدريب النساء بشمال غرب سوريا على الزراعة المنزلية، ويلي أشرفت عليها "مؤسسة حوران الإنسانية".
الهدف منها تمكين النساء ليحققوا اكتفاء ذاتي بظل ارتفاع أسعار الخضراوات، وتم تدريبهم على أساليب الزراعة الفعالة وكيفية العناية بالمحاصيل، وكمان قدموا دعم مادي لتأمين الموارد اللازمة لنجاح المشاريع المنزلية.
وفي مجال إعادة التدوير، "رابطة نساء الشمال السوري" نفذت مبادرة لإعادة تدوير المواد البلاستيكية والزجاجية والمعدنية.
وبتهدف لتمكين النساء اقتصادياً عن طريق تدريبهم على تحويل المواد لمنتجات زينة ممكن يبيعوها، وبالتالي يكون عندهم مصدر دخل مستدام.
ورغم أنه هالجهود خطوة إيجابية، لكن المهندس مؤيد الشيخ حسن بيأكد إنو في حاجة لتطوير أكبر بهالحلول وتفعيلها اقتصادياً، من خلال دراسات تقنية وفنية لنعرف تأثيرها على المجتمع المحلي.
لتعرفوا أكتر عن هالمبادرات، اسمعوا الحلقة الكاملة من بودكاست "شو الحل؟"، ولا تنسوا تشاركونا آرائكم حول فعالية هالمبادرات بشمال غرب سورياو هل هي كافية؟
من خلال التعيق على بوست الحلقة بصفحتنا على فيسبوك "روزنة بودكاست".
