"طيف التوحد"، "متلازمة داون"، وتحديات سلوكية أو معرفية بيعانوا منها الأطفال، وممكن معرفتها بظهور عدد من العوامل مثل: صعوبات بالتواصل أو سلوك متكرر وغير منتظم، والعلاج دائما يتطلب اختصاصيين لمساعدتهم على التأقلم والتفاعل مع الأهل والمجتمع.
بمناطق بتفتقر للخدمات المتخصصة بيكون الموضوع صعب على الأهل والأطفال وهاد واقع عم يعيشوه الأهالي بشمال غربي سوريا، يلي فيها أعداد الاختصاصيين قليل جداً، بالإضافة لنقص وعي بأهمية مساعدة الأطفال اللي بحاجة لعناية خاصة.
وهالشي عم يخلي الأهل وحيدين بمواجهة ضغوطات كبيرة لأنه ما عم يعرفوا يتعاملوا مع أطفالهم ولا عم يلاقوا الخدمات اللي محتاجينها.
وعلى الرغم من تواجد عدد كبير من المنظمات الإنسانية وتخصص بعضها بمساعدة الأطفال والأهل، إلا أن خدماتهم وبرامجهم غالباً بتبقى مقيدة بعدد معين من الجلسات أو زمن معين بغض النظر عن حالة الطفل وحاجته للمتابعة.
هالشي دفع مجموعة من السيدات لافتتاح مركز تطوعي مجاني تحت اسم "بسمتهم أمل"، لتأهيل الأطفال ذوي الإعاقة الذهنية والسمعية واضطراب طيف التوحد واضطرابات النطق والكلام واضطرابات فرط الحركة.
ويهدف لتوفير خدمات متخصصة للأطفال ذوي الإعاقة مثل الجلسات العلاجية والدعم النفسي وزيادة الوعي بالمجتمع بأهمية الكشف المبكر.
لتعرفوا أكتر اسمعوا هالحلقة من بودكاست "شو الحل"، وخبرونا عن تجاربكم أو تجارب أشخاص بتعرفوهم حول موضوع الحصول على الرعاية الخاصة، من خلال التعليق على بوست الحلقة بصفحتنا على فيس بوك "روزنة بودكاست".
