ريكاردو باصوص يكتب على فيسبوك:
تركيا.. إدارة الهجرة.. قسم الأجانب..
ما في ولا موظف بيحكي عربي أو انكليزي، كلو بس بيحكي تركي، طيب معقول الأجانب متلنا نعرف تركي؟ صرت قول لحالي.. معقول ما يحطوا موظف بيعرف عربي؟
- اي دي سكوت.. جاوبت حالي.. عأساس بسوريا كانوا موظفين إدارة الهجرة بلابل بالتركي!
انزعجت من حالي كيف هيك قلت وجاوبتني فورا:
- لك يا بهيم من كتر التراك يلي كان بدون يهاجروا لعنا؟ نحنا ما في داعي نحكي تركي!
- قولتك.. نحنا الموظف عنا مافي داعي يحكي أي لغة أساسا.. بس طالعلون خمسمية ليرة.. وحتى إذا كنت فقمة بيعطوك الإقامة!
- لك أي إقامة؟ مجنون إنت؟ نحن إذا عشت كل عمرك عنا ما حدا بيطلب منك إقامة!
- اي طبعا.. ما حدا سائل عليك لأنو.. ليسألوا عالأجانب!
- تماما.. لكن مافي داعي يحكوا تركي.. إنت مع مين اصلا؟
- لك أنا إنت يا حمار.. سكوت بقا!
- إي سكوت إنت بالأول.. قال نحكي تركي قال!
- لك إنت يلي قلت لازم نحكي تركي!
- جد؟ لك والله ضعت.. خلص تعا نسكت تنيناتنا.
بعد ساعة خناق.. قعدنا أنا وحالي ننتظر دورنا بصمت و نتفرج، نتفرج عالسوريين المعترين الدراويش يلي واقفين عالباب عالدور الهائل، عمبيحاولوا يشرحوا للموظف عالباب شو بدون والموظف عميدفشون لورا مشان ما يدخلوا مع بعض. حاطينلون خيمة صغيرة برا مشان يحتموا من المطر، مو وسعانة نص العالم تحتا!
ويلي ماسكة ولد صغير.. ويلي راكع عالأرض عمبيفضّي جيوبو ويحسب إذا هالكم ليرة تركي بيكفوا، ويلي عمبيدور على مرتو بالعجقة، ويلي شايل والدتو الختيارة وعميركض فيا، قال المثل بيقول : "يلي بيطلع من دارو.. بيقل مقدارو".. طيب يلي ما كان عندو مقدار ببلدو أصلاً.. شو بقيان عندو لينقص منو؟
انتهى البوست هون وقت كتبتو من كم ساعة. اجاني شوية تعليقات حلوة وحساسة من نمط:
* يلي ما كان إلو مقدار ببلدو يضل برا أحسن!
* و شو كان ناقصكون؟
* ليش ما سافرتوا من قبل؟
أنا ما كتير برد عادة، بس للأسف ما قدرت! رديت بالتعليق و رح ضيف الرد هون.. على بعض الإجابات لبعض الأسئلة العميقة في التعليقات:
"الناس شو كان ناقصا؟": الناس كان ناقصا كتير، كونك ما كان ناقصك شي مو يعني غيرك عندو كل شي!
"ليش كانوا بالبلد؟": لأنو ولدوا بالبلد .. إذا انت بتختار وين تولد ولادك مشان ياخدو جنسية، مو يعني غيرك اختار محل ولادتو!
"ليش ما سافروا من زمان!": لأنو مو بإيدو يطلع، ما معو يطلع، ما درس برا ليطلع، ما حدا استقبلو ليطلع!
إذا انت بتصّيف كل سنة برا.. أهلك بعتوك تدرس برا.. وبكرا رح تبعت ولادك يدرسوا برا، وإذا عندك حساب بالبنك وأملاك تجيب فيا وراق وتبوس قفا السفير وتقنعو إنك راجع ومو هربان مشان يعطيك فيزا..غيرك مو هيك! غيرك شكلو هربان! وهو فعلا هربان، ومشان هيك ما قدر يهرب!
إنت يلي كان إلك مقدار ببلدك اليوم عمتعاني ولو شوي برا.. لترتاح عتخت جديد، وتركب غير سيارتك، فكر بيلي كان عميبعاني جوا.. وكان أصلا نايم عالأرض! بأي شارع هو اليوم؟ قبل ما تتفتق أجوبة ذكية ووطنية حارة!
و يلي ما عجبوا الحكي.. في صفحات تانية اكيد بتفكر متلو و رح يعجبو حكيا.
شكراً.
حساب ريكاردو باصوص على فيسبوك، اضغط (هنا)