على أيام ست ستي وستكن والبيوت العربي الواسعة الكبيرة، كانت العيلة كلها تعيش مع بعضها الأم والأب والولاد والكناين، وأكيد كانت تمر أوقات ما فيها وفق بيناتهن، وهاد أمر طبيعي بأي عيلة، بس مع هيك ما كان في أحلى من جمعة الأهل وسهراتهن وحكاياتهن و خاصة برمضان.
هلق صحيح صارت العيله أصغر بس المسؤوليات أكبر، وصارت الست بتشتغل متل الرجال و يمكن أكتر ببعض الأحيان، وحتى لو ما بتشتغل فبكون هالكها شغل البيت والولاد والواجبات العائليه وخاصة إذا كان جوزها من أصحاب الدخل المحدود.
في حلقة اليوم من "لو كنت مكاني" بتحكيلنا يارا صبري عن التغيرات اللي طالت الأسرة السورية، وخاصة بعد ما صارت المرأة تشتغل متل الرجال، وتعقيدات الحياة صارت بتفرض عالزوج والزوجه والأولاد يتساعدوا، تابعوا معنا الحلقة وتعرفوا معنا شو صار.