يعني شو متوقع من بلد صارت باص.. باص.. باص أخضر؟.
مو عاجبك!!؟.. طلاع بالباص وارحل وأوعى تفكر إنو الطلعة ببلاش!!.
الشوفير الروسي والإيراني أخدوا كل شي.. محلك وبيتك ومزرعتك وطلعت الناس من شرشا، بعد ما داقت كافة كؤوس القهر.
معقول نحنا إرهابيين ومو حاسين على حالنا؟.. معقول ما في حل تالت يا نركب بالباص يا يدعسنا الباص؟.
شو متوقع من نظام تحالف مع كل زعران العالم مشان كرسي!؟، متوقع يتنازل عن الكرسي ويركب بالباص مشانك!؟.
لا تتوقع من مواطن عم يرتشي قد راتبو ضرب عشرة وعشرين يرضى بالعدل، لا تتوقع من شرطي مرور يكون شريف.
إذا مو مصدق.. طلاع عالباص وشوف مين راكب بهالباص، ما فيهن ولا موظف مرتشي وما فيهن ضابط تاجر بآلام الناس.
كل ركاب الباص من دراويش البلد، أطفال ونساء ورجال انكسر خاطرن وكمل الكسر بالباص الأخضر.. لك شو متوقع من جيل عم يتهجر على عينك يا تاجر.
والنهاية شوفت عينك.. تغريبة غريبة من نوعا.. باص أخضر!.. أخضر!.. أخضر!.. وبعدك على بالي.