أخي شيل كل شي على جنب.. إعادة الإعمار لمين؟! للقاتل أو للمقتول، للفاعل ولا للمفغول به المغلوب على أمرو، مهجَّر ولاجئ ومسروقة كل أملاكو ومعفَّشة أحلامو، إعادة الإعمار على حساب مين؟.. مين رح يدفع الفاتورة؟.
الشعب السوري تبرع بكل أغراض بيتو كرمال إعادة الإعمار، لك نيالو المتعهِّد على صفقة العمر، أو صعقة العمر، أو صفعة العمر.
الثورة ما بلشت!!.. من 2011 نحنا وعم نتعلم ويتعلَّم علينا، خانونا أقرب الناس وأبعد الناس.. خانتنا مشاعرنا وآمالنا وأحلامنا يللي بدها إعادة إعمار.
شو ممكن يعوضهن؟ زوال الأسد خسارة لطرف، وبقاء الأسد خسارة لشعب كامل، خسارة لناس عطشانة لعدل وديمقراطية، عالحاجز ذُل ما بيعرفو غير إبن البلد.. عالحاجز لادقاني وحمصي وحلبي وإدلبي وديري وجاهل وسفيه، بس بالمحصلة نحنا عم ندفع تمن بقاء قاتل بالحكم، أو عم ندفع فاتورة كبيرة عن سكوت مجتمع كامل عن قاتل بالحكم.
بنرجع للسؤال: بعد الدمار أكيد في عمار مزبوط؟؟، والعمار نوعين.. عمار بلد وعمار مخ.
إعادة الإعمار لمين؟!.. لمين لمين؟!! وبعدك على بالي.