هالحرب عم تستخدمنا أبشع استخدام.. منظر مرأة عجوز نايمة ع كتف الرصيف بيخليك تكره عمرك، تكره حالك وآمالك وأحلامك المؤجلة.. لا تتوقعها تكون "مؤيدة " ولا تتوقع تكون معارضة.
بس الأكيد إنو عم تدعي علينا من نص قلبها من برد الرصيف بالشتي وحراماتها السودا متل سمانا ومخدتها يلي عبارة عن نص بلوكة..
بيخطرك تسأل وين بتقضي حاجتها أو يمكن ما بتشبهنا ما عندها حاجة.. أغلبنا بيتجنب يسلم عليها أو حتى يقرب منها ولو أمتار قليلة منخاف نتوسخ.
لك في اوسخ من هيك بالدنيا، في بمجلس الشعب والقصر الجمهوري.. الوساخة الحقيقية بالسلوك، وبالنتيجة كلياتنا بنطلع نايمين عالرصيف.
آخ يا وجع.. آخ يا وجع ..في شعب نايم بالجناين والشوارع ينص أقدم عاصمة بالتاريخ.
كاس القهر ما كان يفضى.. وإنت عم تحاول ترضي كل الناس وما حدى عم يرضى!!!