فترة البث المشترك اليوم كانت مع زملائنا براديو "صوت راية" وحكينا فيها مع زميلتنا "أروى الباشا" مقدمة برنامج "صباحكم سوريا"، بموضوعنا المشترك بمناسبة "اليوم الدولي لحقوق الإنسان" وسؤال روزنامة روزنة لليوم: "هل أنصفت منظمات حقوق الإنسان السوريين؟ وليش؟".
أروى قرتلنا بعض مشاركات المستمعين تعليقاً على موضوع الحلقة، وبلشت من عند فاروق اللي قال: : "في اليوم العالمي لحقوق الإنسان يخرج أهل حمص الطيبون من بيوتهم ويغادرون اللؤلؤة السورية والجوهرة الوسطى. في هذا اليوم تغيب نكهة الفكاهة الحمصية من الشوارع و تشنق ضمة الحاء التي يلفظهما الحمصيون حومص.فأي حقوق وأي إنسانية بعد حمص". كمان عبلة المنيف علقت على موضوع الحلقة وقالت: "حقوق الإنسان منشأة قامت بأيدي غربية،أين هو منع هتك روح وفكر وجسد الإنسان وهو يذبح من الوريد للوريد بكل لحظة بسوريا،أين الرحمة بإنسان تقذف القنابل فوق رأسه بإستمرار وتقطع ولده ووالده ومن يحب لأشلاء!".
مهدي كمان قرالنا مشاكات أصدقاء روزنامة روزنة، وبلش من عند أيهم اللي علق عالموضوع وقال: "المنظمات الانسانية هي أكبر كذبة للإنسانية بشكل عام لأنه للأسف فشلت فشل ذريع بإيقاف كل طرق الموت الممكن إيقافها بحق الشعب السوري وأهملت مساعدة اللاجئين السوريين بالداخل والخارج". كمان مصعب شارك على بوستر البرنامج على صفحة روزنة وقال: "يمكن اذا سألت أي واحد سوري راح يقول ما أنصفت ولا شي والمشكلة العطل مش من حقوق الإنسان العطل من كل الدول... وأنا بقول حقوق الإنسان عملت يلي عليها وكمان شو ما قدمت ما راح يبين لأن 13 مليون نازح مش مليون ولا ألاف".
فيكن تسمعوا الفقرة كاملة بالضغط على زر الاستماع.