فترة البث المشترك اليوم كانت مع زملائنا براديو وطن، وحكينا اليوم مع لولي وسومة عن موضوع حلقتنا اللي رجعنا فيه لفترة الجامعة، وسؤال روزنامة روزنة لليوم: "علاقات الحب بفترة الجامعة بتستمر برأيكن؟ وليش؟".
أما موضوع صباحكن وطن كان مختلف، وكان هاشتاغ وطن لليوم: "#إذا كان حدا مقرّب منّك مدخّن وإنت لأ، هل بتتأقلم مع الموضوع أم ممكن تمنعه؟ .. وشو رأيكن بالشريك يلي بيفرض قبل العلاقة على شريكه قطع التدخين هل هيّة طريقة عمليّة ومنطقيّة ولّا لأ؟".
مهدي وزينة ولولي حكو عن موضوع العلاقات اللي بتنتهي لسبب أنو أحد الشريكين مدخن. زينة قالت أنو ممكن تسبب هي العادة إزعاج، بس ما بتوصل للانفصال بين الشريكين لهاد السبب فقط، وممكن تكون في أسباب تانية. كمان حكينا عن عادة التدخين اللي كانت منشرة بالمجتمع السوري، حتى بالمدارس وبالمؤسسات الحكومية، قبل القوانين اللي طلعت بالفترة الأخيرة.
أما بسؤال روزنامة روزنة عن الحب بفترة الجامعة، سومة قالت: "أنو العلاقات بفترة الجامعة في نوع من البراءة والأحلام الكبيرة، بس قليلة كتير العلاقات اللي استمرت بعد فترة الجامعة أو تكللت بالزواج".
أما بمشاركات أصدقاء روزنامة روزنة على بوستر الحلقة عالفيس بوك، زينة قرأت تعليق رامي اللي قال: "انا بقول حسب الجامعة عالأغلب الجامعات السورية ما بتستمر العلاقة فيها لانو الشب يا معتقل يا مخطوف يا ميت يا متخبي بالبيت وبتروح عالأمورة".
لتسمعو مشبكنا كاملة فيكن تضغطو على زر الاستماع.