اليوم مشبكنا كان مع زميلتنا لولي من راديو وطن، وحكينا بموضوعنا المشترك عن أول شغل اشتغلناه بحياتنا وشو بيعنيلنا، وكتار شاركونا وخبرونا شو هو أول شغل اشتغلوه بحياتهن، على بوستر روزنامة بصفحة أو على بوستر صباحكن سوري بصفحة راديو وطن.
لولي خبرتنا أنو بلشت "مشوارها المهني" متل معظم صبايا البلد، وهو الدروس الخصوصي، لأنو أكتر من 50% أو 60% الصبايا طالبات الجامعات، عطو دروس خصوصية، أو درّسو بالمدارس الحكومية على نظام الساعات، ولما سألنا لولي عن السبب اللي خلاها تعطي دروس خصوصية، قالتلنا أنو يمكن لأنها شغلة إرادية وما حدا بيلزمنا فيها بدوام، وبالنسبة إلها التدريس متعة.
حكينا كمان عن المهن العائيلة المتوارثة، واللي هي غالباً بتكون أول شغل بالنسبة لكتير من الشباب، وعن الشباب السوري اللي "سبّع الكارات"، الشي اللي اعتبرتو لولي إيجابي وسلبي بنفس الوقت، لأنو ما في تحديد للمهنة والتخصص والهدف، ويمكن تعدد المهن هو الشي اللي أنقذ السوريين بظل هي الظروف.
لتسمعو مشبكنا كاملة فيكن تضغطو على زر الاستماع.