اليوم شبكنا مع راديو "وطن" وزميلتنا لولي مقدمة برنامج صباحكن وطن، وحكينا عن موضوعنا الموحد لليوم وهو الصحة النفسية للسوريين بظل أوضاعهن السيئة، بمناسبة اليوم العالمي للصحة النفسية.
ولاء بلشت بسؤال وطن اللي هو: "بعد الأوضاع الحالية بسوريا ليش في ناس بتفكر أنو الروحة لعند الطبيب النفسي عيب؟" أغلب مستمعي راديو وطن قالو أنو ما عندهن مشكلة ابداً بمراجعة الطبيب النفسي، وأنو هالشي أبداً مانو عيب، وأنو المرض النفسي متل المرض العضوي ولازم نتعامل معو بطريقة أفضل من الطريقة اللي كنا نتعامل معها قبل.
زينة ذكرت بعض الطرق اللي بنقدر فيها نتجاوز حالة الاكتئاب والقلق ومنها القراءة قبل النوم، اللي بيفتح مجال للخيال وبيخلينا ما نفكر بالموضوع اللي سببلنا الاكتئاب، كمان النوم لساعات كافية بيسحن الحالة النفسية وبيخفف الشعور بالتوتر، وفينا ناخد لحظات ونقعد فيها لحالنا ونتأمل، بدون ما نستحي من اللي حوالينا، لأنو التأمل بيساعدنا نخلص من حالة الاكتئاب.
فيكن تسمعو فقرة "مشبك" مع راديو وطن كاملة بالضغط على زر الاستماع.