حكينا اليوم بفقرة "فنجان قهوة"، مع شب سوري مقيم بألمانيا وواصل حديثاً إلها، رافع عبّارة، صيدلاني سوري من حمص، مر برحلة الموت من تركيا لإيطاليا وشاف العذاب يلي بيمروا فيه السوريين والمهاجرين الهاربين من الصراعات الدائرة ببلدانهم، ومن وقتها صار يشارك بمساعدة "البلمات" يلي عم تغرق، ويتصل بخفر السواحل اليوناني أو التركي كمحاولة لإنقاذ أكبر عدد ممكن من اللاجئين، حب رافع يشاركنا بتجربته ونصائحه لكل يلي ناويين يطلعوا بالبحر، ومنذكر أنه في شباب سوريين كتير تطوعوا بهاد المجال ليساعدوا الناس اللي عم تطلع بقوارب الموت وينقذوها من الغرق.
وبأحد منشورات رافع، كتب بعض النقاط المهمة يلي لازم يتم العمل عليها:
"طلعة البلم من تركيا الى اليونان: انا ماعما انصح الناس تطلع طبعا بس هي النصائح للي طالع الله يحميكون.
1- أول شغلة لازم تعرف وضع البحر قبل ما تطلع "sea conditions" هاد اسم برنامج بتنزلو ع موبايلك إذا وضع البحر سيء لا تغامر ابدا.. بس بإذن الله بتطلع وبتوصل بالسلامة..
2- بتعبي موبايلك رصيد حر دولي ليرات وليس باقات أو دقائق، مشان النت والاتصال يكون كافي وعلى طول بتتفق مع شخص تضل تبعتلو موقعك عالواتس "تحديدا ارسال موقع" وليس تصوير الشاشة ويكون معك "باور بانك" للشحن اذا فضي شحن موبايلك.
3- وقبل ما تطلع بكون معك رقم خفر السواحل التركي واليوناني.. وتبقى عم تتواصل مع شخص ع الواتس مشان يساعدك ويتصل ع الخفر.
ملاحظة للركاب: بتلبسوا سترة النجاة وبتصعدوا البلم وبتختاروا مكان وبتقعدوا لحتى الوصول بالسلامة، ويفضل عدم الصراخ وتوتير الاطفال والنساء هاد طبعا الكلام للكل للرجال والنساء".
اسمعوا المقابلة لتعرفوا تفاصيل أكتر.