بوسط كل مآسي السوريين، وصور الدم والمباني المهدمة وسرقة التاريخ، والعالم عم يتفرج ومو سائل، اجت صورة الطفل السوري آلان لتشكل صدمة عند الرأي العام العالمي، تحديداً أنو آخر فترة صار حكي كتير عن موضوع اللاجئين السوريين اللي عم يوصلوا على أوروبا.
الموضوع مو جديد، والبحر ما عم يشبع من أجساد السوريين، والناس اللي بتركيا كانوا مصدومين يمكن أكتر من باقي العالم، لأنو كان بيفصلون عن آلان كيلومترات قليلة جداً وفي منهم كانوا عم يحضروا حالهم مع أطفالهم ليطلعوا كمان.
كان لروزنة السبق بإجراء أول لقاء مع والد آلان، وبدنا نكمل حكي بس هالمرة عن شعور السوريين عن اللي صار، حاولنا نرصد كم الوجع و الألم بعيون الناس بالشارع، وأصواتهم حكت جزء صغير من اللي موجود بعيونهم.