حكينا مع مراسلنا هشام الخطيب من السويداء، وخبرنا أن الحراك السياسي بمدينة السويداء أُعدِم بسبب الضغط من قبل النظام السوري واتجه أغلب الشباب إلى العمل المدني بسبب الجهل السياسي بشكل عام، ففضلوا الإتجاه إلى أعمال إغاثية ومدنية، وصار في اعتقالات بسبب العمل الإغاثي من قبل بعض "الشبيحة"، وبالنسبة للطرقات جميع الطرق سالكة والطرق إلى القرى الغربية سالكة أيضاً، أما الطرق إلى القرى الشمالية عم تعاني من زرع عبوات ناسفة على الطريق.
بالنسبة لسعر صرف الدولار عم يكون بين 311 – 313 ليرة، أما عن أسعار بعض المواد الغذائية حكالنا هشام عن ارتفاع طفيف بالأسعار على النحو التالي: كيلو السكر 150 الرزبـ325 وسعر السمنة الحيوانية بين 1400 – 1500، أما كيلو اللبنة 650 وكيلو اللحمة بين 1900 – 2200 ليرة سورية.
ومن السويداء رحنا على عين العرب " كوباني " مع مراسلنا آختين أسعد وخبرنا بأنه الطريق من القامشلي لكوباني يستغرق 4 ساعات ونص تقريباً والباصات موجودة ومؤمنة للمنطقة ولامشاكل على الطريق، باستثناء أنه طريق تل أبيض كوباني مو معبّد، والمدينة لساتها عم تعاني من خراب ودمار كبير.
بالنسبة لأسعار بعض المواد الغذائية فهي مشابهة للقامشلي والحسكة، ووصل سعر كيلو اللحمة لـ 2000 أما الفروج بـ1000 ليرة، الزيت البلدي بـ1000 كمان وكيلو البندورة بـ100 ليرة، وربطة الخبز نوعيتها أفضل من القامشلي ووصل سعرها لـ 25 ليرة، الكهرباء معدومة بالمدينة والاعتماد عم يكون على محركات الديزل وبيوصل سعر الأمبير لـ 1000.
تفاصيل أكتر بتسمعوها بـ"تحويلة" اليوم.