حكينا مع مراسلنا كرم منصور من دمشق وخبرنا أن الحدود اللبنانية عم تشهد تدقيق كبير وعم يطلب من الشخص الراغب بالدخول مبلغ 1000 دولارعلى الأقل أو حجز فندقي أو إثبات لمقابلة في إحدى السفارات ليقدر يدخل عن ارتفاع سعر صرف الدولار يلي وصل لـ 305 - 307.
أما أسعار السلع والمواد الغذائية خبرنا كرم أن العنب بعد أن كان الكيلو يباع بـ35 ليرة صار بـ250 – 300، رغم كونه الموسم، وكيلو الخيار بـ 200 ليرة أما البندورة بـ 225، ولازال هناك إقبال على "سوق التنابل "، ويلاحظ أن العائلات النازحة عم تعمل بمجال الخضار والفواكه لتأمن مدخولها اليومي.
ومع اقتراب الشتاء وموسم شراء الصوبيات خبرنا مرسلنا بأن أزمة المازوت مستمرة، و قريباً رح يتم توزيع دفتر لكل عيلة لتحصل على 150 لتر مازوت على دفعات، ونوه لحصول ظلم بفترة التوزيع وأحياء بتاخد دفاتر و أحياء ما بتاخد.
ومن دمشق رحنا على ريف حماة مع مراسلنا محمد الحموي وخبرنا عن أوضاع الطرقات الخطرة حالياً، وخاصة طريق قلعة المضيق الصقيلبية خطر، وطريق محردة الصقيلبية يشهد اشتباكات.
بالنسبة لدخل المواطن بمناطق النظام السوري، فالموظف الحكومي عم ياخد راتب بين 25 – 30 ألف وهي مابتكفي، بسبب الغلاء، سعر قالب البوظ 1000 ليرة سورية واشتراك آمبير حوالي 2000 ليرة، لذلك يضطر الشبان في العائلة انهم يطلعو ويشتغلو ليعيلوا أهاليهم.
الكهرباء بمناطق النظام فيها تقنين وبيوصل لـ18 ساعة أحياناً أما بمناطق المعارضة عم تكون اشتراكات آمبير، وخبرنا مراسلنا أيضاً عن في ارتفاع بأسعار المحروقات نتيجة ارتفاع صرف الدولار وصار لتر المازوت بـ 140 والبنزين 425، أما جرة الغاز 3700، وهالأسعار بمناطق سيطرة المعارضة تحديداً، أما الدولار فوصل لأعلى سعر له منذ أكثر من 4 سنوات وسعر صرفه اليوم شراء 312 مبيع 314.
تفاصيل أكثر بتسمعوها بـ"تحويلة" اليوم.