تغيرت طقوس الزواج في مدينة حلب، خلال السنوات الماضية، بسبب القصف والوضع المتراجع، بحسب ما أخبرانا مراسلنا يمان الخطيب، وقال أنو العرس كان يصير بصالة وحالياً عم يكتفوا بإقامة حفلة صغيرة بحوش عربي أو بيت صغير، أما عن بعض الطقوس المتعلقة بالعرس ضلت موجودة متل الذهب عند أغلب الأهل عم يطالبو بشراء ذهب للعروس، أما البيت "الملك" ماعاد ينطلب بسبب القصف المتواصل، وعم يحاولوا العائلات يعملوا الحفلات بمناطق بعيدة عن مناطق التماس.
أما بالنسبة لطرقات المدينة خبرنا يمان أنو بمنطقة حلب القديمة في اشتباكات قوية، وقصف واشتباكات بحي صلاح الدين والأحياء الغربية، أما المناطق الشرقية رجعلها الهدوء هاد الأسبوع، وبالنسبة لموضوع التداول بالليرة التركية فهو خفيف ولسا الناس عم يتداولوا الليرة السورية وفي رفض عام لموضوع التداول بالعملة التركية والإرتباط بالليرة السورية عم يعتبروه الناس نوع من أنواع التراث والثقافة والتشبث بالوطن، أما أسعار المحروقات بحلب حكالنا يمان انو وصل سعر لتر البنزين النظامي لـ425 أما المازوت فسعر اللتر 225 والمازوت المكرر 125 ليرة للتر الواحد.
تفاصيل أكتر بتسمعوها بتحويلة اليوم.