بفقرة تحويلة لليوم.. حكينا مع مراسلنا أيهم دال من داريا وخبرنا بأنه الناس تأقلمت مع التصعيد الحاصل من قبل قوات النظام، واللي خلف أكثر من 40 قتيلاً.
أما بالنسبة للمواد الغذائية خبرنا أيهم انو الخبز مفقود من سنيتن ونص واعتماد الناس على القمح والشعير إن توفر، وحاليا عم يتم طحن الرز والبرغل مشان يعملوه خبر.
وعن أسعار بعض المواد: كيلو الرز 2000 البرغل 1500 – 2000، وبعض التجار عم يحتكروا المواد إذ بيشتروها بفترة تكون المعابر مفتوحة وبينطروا لتتسكر المعابر وبيرفعوا الأسعار وبيبيعوا كيلو الرز يلي بـ125 بـ600 ثم بيرفعوا سعره ليوصل لـ1500.
أما عن أوضاع المحروقات فوصل سعر جرة الغاز إلى 50 ألف وتنكة المازوت 50 ألف أما لتر البنزين 3700 والمازوت المتسخرج من البلاستيك 20 ألف.
وبالنسبة لسعر صرف الدولار 270 – 260 وهو منخفض عن دمشق بسبب ضعف الطلب عليه.
ومن داريا رحنا على ريف اللاذقية مع مراسلنا جمال الدين العبدلله وخبرنا عن اشتباكات على بعض المحاور والطرقات الرئيسية بريف اللاذقية مستهدفة، وحكى مراسلنا جمال عن موضوع هام وشائك يلي هو بقايا البرميل المتفجرة، اللي عم تتم المتاجرة فيها أحيانا وتسمى باللهجة العامية "الأراضة" اي الخردة، وبيطلق عليهن اسم "صيادين البراميل"، إذ بيتم بيع البرميل الغير منفجر بمبلغ عالي بيوصل من 3 – 4 آلاف دولار، أما البرميل المحلي يباع بـ2000 دولار، أما البرميل المنفجرة يتم بيع ما بداخله من قطع المعدن والمسامير.
وعن موضوع التوعية من مخاطر الألغام ومخلفات الحروب خبرنا مراسلنا جمال انه هاد شي مهم بسبب عدم معرفة كل الأهالي عن هاد الموضوع وأغلب الناس عم تتجاوب وتخبر الجهات المعنية بالموضوع لإبعاد هاد الخطر عن الأطفال وأهلهن، وبالنسبة لسعر صرف الدولار 308 شراء 312 مبيع، و الليرة التركية 112 شراء 116 مبيع
أما عن أسعار المحروقات: جرة الغاز 4 آلاف، لتر المازوت 150 أما لتر البنزين 500 وأغلب المناطق تعتمد على الكاز.
تفاصيل أكتر بتسمعوها بتحويلة اليوم.