حكينا مع مراسلنا هشام الخطيب من السويداء، وخبرنا أن أزمة المحروقات عم تتحسن نسبياً وخفت عجقة الكازيات وزادت الصهاريج المخصصة للمدينة من 6 إلى 8، حكومة النظام توزع المازوت على شكل بطاقات وهي عبارة عن 8 بطاقات لكل بطاقة 40 لتر لكل بيت، أما جرة الغاز فسعرها بيتراوح بين 1500 – 1700، أما عن سعر صرف الدولار 301 – 302، واليورو 340 – 345.
بالنسبة للخبز فهو على وضعه بسعر 35 ليرة من الفرن، أما برا الفرن سعره بين 50-70 ولونه أسمر بسبب الطحين، وأسواق الخضرة بالسويداء مستقرة بشكل عام وسعر كيلو الباذنجان اليوم 60 ليرة سورية، والثوم والكوسا 300 والفاصولياء 200، أما الارتفاع الملحوظ فكان بسعر المواد الغذائية بسبب تكاليف نقلها، ووصل سعر الزيت 550 – 650 أما السمنة 1300- 1400 والشاي 1850 – 1950 ليرة للكيلو الواحد.
ومن السويداء رحنا للقامشلي مع مراسلنا آختين أسعد، وخبرنا أن طرقات الحسكة معظمها سالكة، وأسعار البنزين في ارتفاع من 60 ليرة للضعف تقريباً، هالشي أدى لإضراب لسيارات الأجرة بسبب غلاء البنزين مع بقاء سعر التوصيلة على حاله، وسعر صرف الدولار يلي تراوح بين 303 – 300 أما الليرة التركية 110 واليورو 330، وبالنسبة لسعر الزيت النباتي 4 لتر بـ1500 ليرة والجوز عم يتجاوز سعره الـ1000 ليرة مع موسم مونة المكدوس.
تفاصيل أكتر بتسمعوها بـ"تحويلة" اليوم.