حكينا مع مراسلنا حسام البرم من درعا، وخبرنا إن الجو رجع معتدل بالمدينة وريفها، والتخوف فقط من قصف الطيران، أما عن سعر قالب البوظ فوصل لـ 250 ليرة سورية وهو بيكفي 4 ساعات فقط، أما بوري البوظة فأهالي درعا نسيوا هالنوع من المثلجات، بسبب صعوبة وصوله وذوبانه على الطريق وبيوصل سعر القطعة لـ 150.
وضع الكهرباء سيء بسبب تلغيم بعض أعمدة توتر النقل الدولي، ما أدى لقطع الكهرباء بالريف الغربي، أما الريف الشرقي حال الكهرباء فيه أفضل بشوي، بالنسبة لمادة الخبز فانقطعت لمدة 4 أيام، بسبب إغلاق المعبر والاشتباكات وهالشي خلق أزمة واستعاض الناس عنه بالخبز الأسمر، ووصل سعر الربطة يلي فيها 8 أرغفة إلى 250 ليرة سورية، وفي ارتفاع بسعر الدولار، وصل لـ 298 مبيع 300 شراء .
ومن درعا رحنا ع حمص مع مراسلنا أحمد الحمصي، وحكالنا إنه الطرق الخاضعة لسيطرة النظام السوري سالكة متل تيرمعلة في الريف الشمالي أما داخل مدن الريف الشمالي فالطرق الداخلية سالكة ولكنها معرضة للقصف.
بالنسبة لأسعار المواد الغذائية والخضار فارتفعت أسعارها، ووصل سعر كيلو الخيار لـ 70 البندورة 50 والبصل 60، أما كيلو السكر بـ 175 والرز 245 ليرة، أما لتر الزيت النباتي يباع بـ 400 ليرة، ومع اقتراب موسم المكدوس خبرنا مراسلنا إنه الجوز شبه مفقود، والباذنجان متوفر بسعر رخيص ويباع الكيلو بـ 40 ليرة سورية.
تفاصيل أكتر بتسمعوها بـ"تحويلة" اليوم.