تتعرض مدينة داريا لحملة كبيرة من قبل قوات النظام السوري، بحسب ما أخبرنا مراسلنا أيهم دال، وأغلب الطرقات معرضة للقصف اليومي ببراميل متفجرة وقذائف مدفعية، وهالشي متزامن مع موجة حرارة عالية، ومع ذلك عم يضطر الأطفال يقعدوا مع أهاليهم في أقبية أو مناطق محصنة عالرغم من درجة الحرارة العالية.
أما عن المواد الغذائية بداريا فأغلبها مفقود من 18 يوم بسبب إغلاق معبر المعضمية، والاعتماد عم يكون على وجبة وحدة يوميا، والأسعار خيالية بالمنطقة إذ وصل سعر كيلو السكر لـ3 ألاف وكيلو الطحين 4 ألاف أما الرز 2000 والبرغل 2000، والمحروقات في حالة فقدان تام وسعر لتر البنزين بين 5 – 6 آلاف ليرة أما لتر المازوت بـ 4 آلاف ليرة.
ومن داريا رحنا على ريف اللاذقية لنحكي مع مراسلنا جمال الدين العبدلله وخبرنا عن تحضيرات الأهالي بالريف لمونة الشتوية متل دبس الرمان وخل التفاح، ووصلت أسعار التفاح بين 150 200، أما أجار سيارات نقل الفواكه ارتفعت أسعارها 5 أضعاف بسبب المرور عالحواجز وغلاء المحروقات، بالنسبة للطرقات الطريق بين ريف اللاذقية وأريحا أعيد فتحه من جديد، أما طريق تركيا فالوصول عم يكون بطريقة غير شرعية والناس تضطر للنوم مدة 10 أيام أحياناً لتلاقي فرصة دخول.
تفاصيل أكتر بتسمعوها بتحويلة اليوم.