قالب الثلج بـ800 ليرة في حماة

قالب الثلج بـ800 ليرة في حماة

درجات الحرارة المرتفعة يلي تجاوزت الـ40 درجة مئوية بسوريا، دفعت الأهالي بريف حماة لشراء قوالب الثلج، ووصل سعر القالب لـ800 ليرة سورية، بحسب ما أخبرنا مراسلنا محمد الحموي، وتحولت صناعة ألواح الثلج لتجارة مربحة بهالوقت من السنة، وحكالنا محمد عن وضع المياه بحماة وريفها وخبرنا أنو بعض المناطق بتجيها المي الرئيسية بحماة المدينة، أما بالريف فأغلبه معتمد عالصهاريج وعم يوصل سعر 5 ألاف لتر من المي لـ2000 ليرة، بالنسبة لوضع الكهربا بمركز المدينة عم توصل ساعات التقنين لـ17 ساعة أحياناً أما بالريف بتعتمد الكهربا على اشتراكات الأمبيرات. 

أما عن الخبز، متوفر عن طريق بعض الهيئات الإغاثية أو الخيرية بسعر يتراوح بين 100 – 150 ليرة سورية، بالنسبة لأسعار بعض الخضروات: البندورة 70 باذنجان 70 خيار 100 بصل 75 بطيخ 55، وحكالنا محمد عن أسعار المحروقات المرتفعة، حيث وصل سعر لتر المازوت 125 – 135 ، الكاز المكرر 165 البنزين المكرر 200. 

ومن حماة رحنا لعند مراسلنا كرم منصور من دمشق وخبرنا انو الحر بيبدأ من الثامنة صباحاً مترافق بانقطاع الكهرباء وعم توصل ساعات التقنين لـ12 ساعة ببعض المناطق، وخبرنا كرم عن مسارات جديدة للسرفيس بالشام و انو أقرب مشوار بياخد نص ساعة بسبب الحواجز، وتعرفة الركوب تضاعف سعرها وصارت بين الـ35 - 55 ليرة ضمن الشام أما المناطق برا الشام تعرفتها أغلى، تفاصيل أكتر بتسمعوها بتحويلة اليوم.

 

نحن نستخدم ملفات تعريف الارتباط "الكوكيز" لنمنحك أفضل تجربة مستخدم ممكنة. موافق