حكينا مع مراسلنا حسام البرم بدرعا، وخبرنا إنه الناس نسيت موضوع الاستماع إلى الأغاني بظل القصف والحصار، ولكن لازالت الموسيقى حاضرة أكتر شي بوقت الأعراس ولساتها الأغاني الفلكلورية الحورانية بتتغنى، ويلي بيسموها باللهجة المحلية "الهجينية".
أما عن تكلفة الأعراس بدرعا فحكالنا حسام، انو خلال هالفترة اختلف الوضع عن أول من ناحية المقدم والمأخر والذهب كمان، والأهالي صارت تتغاضى عن دفع المبالغ الكبيرة بسبب الحالة الإقتصادية المتدهورة لأغلب الناس، وطقم الذهب اختصر بمحبس وحابس يعني حوالي 100 دولار فقط، أما قبل فكانت العروس تلبس طقم ذهب كامل "من حلق وطوق وساعة وأساور"، وخبرنا إنه سعر غرام الذهب عيار 21 هو 9200 ليرة، وسعر صرف الدولار هو شراء 292 مبيع 293.
ومن درعا رحنا على حمص لعند مراسلنا أحمد الحمصي، يلي ماقدرنا نحكي معه بسبب سوء الاتصالات، لذلك بعتلنا تفاصيل عن الأسعار بحمص وريفها وهي على الشكل التالي: البطاطا والكوسا والخيار والقرع 50 ليرة سورية، البندورة 35 ليرة، البامية 200 و الفاصوليا الخضرا 75 ليرة.
أما بالنسبة لأسعار بعض المواد الغذائية فوصل سعر كيلو السكر لـ 175 والرز لـ 235 وزيت دوار الشمس 375 بينما سعر كيلو السمنة 455 ليرة سورية، أما عن أسعار بعض أنواع المحروقات فسعر جرة الغاز 3770 ليرة سورية، ولتر البنزين بـ 275، أما سعر الصرف في حمص وريفها: الدولار 293 مبيع 296 شراء، اليورو مبيع 329 شراء 323.
تفاصيل أكتر بتسمعوها بـ"تحويلة" اليوم.