نحنا اللي طلعنا شو تركنا؟ تركنا شقف زريعة نسيوا يسقوه الناس اللي أخدوا البيت من بعدنا، تركت غرفتي بدون ترتيب متل كل مرة، بس أمي هالمرة ما انتبهتلا ولا انتبهتلي، تركت طاولتي، وكومة أوراق لكلام كتبتو ومحيتو مية مرة، تركت شباك و زرعات لونهن أخضر، لأن وقتها كان الأخضر تهمة اللي مالو تهمة، تركت دعوات ستي.. "الله يحمي الكل، و يرجع الكل، و ياخد الكل". كيف ظبطت معها ما بعرف ، و طلعت بدون ما أقدر أسألها، مين الكل؟