الكليات اللي بتكون نظرية، غالباً بتكون متل المدن اللي عالبحر، مدن سياحية وبتستقبل الغريب برحابة صدر، والكليات العلمية، هي اللي بتكون مرتبة وللشاطرين.
اشتقت لدرج الكلية، واشتقت أرجع طالب، بعد ما صرت مسعف و مسلح، بعد ما صرت إعلامي و مأسور بذكريات قديمة.
فضيت الساحات، اللي هاجر واللي تركها وهرب منشان ما يعتقلوه، واللي ناطر ايمتى بدو يخلص ويطلع منها، واللي عمل عروض للأزياء بالساحات والقاعات ودبكات للمسيرات العفوية المليونية، ملامحها ماعادت هي، وشجرة الصفصاف اللي كانت تستر الحبيبين، قصوا جناحاتها منشان القناص يشوف منيح.
قولها، اشتقت لجامعتي، وللون الرصيف الأصفر ولعامل البوفيه أبو ياسين.
شي بيهددوا باستهداف الجامعات و شي بيهددوها، أمانة بس تمرق من قدام كليتي، سلملي عليها وأسألها، كيفها اليوم؟.