مهما حاولت تزيح الذكريات القديمة عن بيت جدك من الذاكرة حتى تحط بدالها صور جديدة، ما رح تقدر، ورح تبقى موجودة لأنها متل الحضارات القديمة اللي بتنكتب على حيطان الدماغ، قد ما كبرت بعمرك مارح تشوف زرعات بيت جدك دبلانين، رح يبقى اللون أخضر.
الأمثال و القصص اللي بتحكيها الجدّات للأحفاد، هنن اللي بيرتبوا الذاكرة وقت بتفقدها، رجاع خبيني بحضن ستي، اللي أول مين عملي شعراتي ضفيرة وربطتلي كل الهم وخبتوا بحضنها، كيفك يا ستي؟