كيف تعبّر عن غضبك في ثلاث خطوات سريعة؟
طالع بيان، اعمل تصريح، اخترع خبر، علّق عند فلان وسب واشتم، معصّب وبيطلعلك تعبّر على كيفك.
ولا تنسى وأنت معصب أنك تخبط باب هالافتراضي وتمشي، حرّكلي حالك، يعني إذا مو قادر تكون جزء من الحل؟ كون جزء من مشكلة ومشكلة كبيرة كمان، المهم تحركلي خيالك وابداعاتك ولاتقعد وتصفن بالسما الزرقا.
واقف عالحاجز؟ مو عاجبك شي؟ خرطشلي هالبارودة وعبّر عن غضبك وخلّي الرصاص يعبي الجو، وأهم شي بكل تعابير غضبك أنك تحتفظ بحقوق الرد دائماً، أوعى تفرّط فيها عالفاضي، خلّي حق الرد بجيبتك، وبس حدا حكى معك شي كلمة زاحلة.. أطلق العنان لجناحاتك وطالع حق الرد وارميه بنص خلقتو.