تهريب المازوت ينشط في دمشق

تهريب المازوت ينشط في دمشق
تهريب المازوت ينشط في دمشق

زادت اشتراكات الأهالي بـ"الأمبيرات" بريف حماة، بسبب ارتفاع درجات الحرارة بشكل كبير خلال الأيام الماضية، بحسب ما أخبرنا محمد الحموي مراسل "روزنة"، وانتشرت بين الأهالي أنواع من المراوح بيتم شحنها أو مراوح بتشتغل عالبطارية.

أما وضع المياه في ريف حماة، فالأهالي بيشتروها من الصهاريج الموجودة ويلي بتلف ببعض المناطق.

ومن حماة للعاصمة دمشق مع مراسلنا كرم منصور اللي خبرنا عن سوء خدمة الانترنيت خلال هالفترة، بسبب قطع الكهربا، وحكالنا عن حملة مداهمات ببعض الأحياء مشان ياخدوا الشباب عالعسكرية، أما منطقة قدسيا والمعضمية عم يعانوا من حصار خانق، وتكلفة السيشوار صارت تختلف بمحلات الحلاقة وصارت تكلف 350 اذا الكهربا جاية و 550 اذا مقطوعة.

وخبرنا كرم أنو سعر صرف الدولار مستقر بين 300 – 303 أما بالمصرف المركزي فسعره الثابت الحالي هو 262، بالنسبة لبعض الفواكه الموسمية الصيفية بأسواق الشام وصل سعرالتفاح لـ 450 الخوخ 300 الدراق 400 الكرز 1100 البطيخ الكيلو بـ 45 ليرة سورية.

أما الكازيات بدمشق فزحمتها خفيفة هالفترة مقارنة مع باقي المحافظات وتهريب المازوت عم ينشط هالفترة، أي ان المازوت بيكون مخصص لمنشآت عامة ونتيجة الفساد بينباع بأسعار عالية، أي اللتر يلي بـ 135 بيوصل سعرو لـ   235 ليرة سورية.

تفاصيل اكتر بتسمعوها بتحويلة اليوم.


:الكلمات المفتاحية

الحلقات